Urola Kostako Hitza

Kiroldegirako langileak bilatzeko bi lehiaketa deitu ditu Udalak

Zestoa Begirale gisa aritzeko lan-poltsa osatzeko deialdia egin du; masaje zerbitzuarentzako ere lehiaketa deitu du

i. leturiondo

Zestoako Udalak bi deialdi publiko egin ditu Kiroldegirako langileak bilatzeko. Batetik, Kiroldegiko begiraleak kontratatzeko lan-poltsa deialdia egin du, eta bestetik, kiroldegian masaje zerbitzua eskaintzeko norbait kontratatzeko lehiaketa deitu du. Udal kirol instalazioetan sor daitezken pertsonal beharrei erantzuteko osatuko dute begiraleen lan-poltsa, lehiaketa-oposaketa sistema jarraituz.

Begiralearen eginkizunak hauek izango dira: mantenuko soinketan jardutea; kirol laguntzaile lanak betetzea; kirol instalazioetako mantenuaz eta garbitasunaz arduratzea; eta bazkideei buruzko gestio lanak egitea.

Masaje zerbitzuko langileek, aldiz, Udal Kiroldegikoam kirol-masaje eta masaje terapeutiko zerbitzuaz eskaintzeaz gain, erabiltzen diren gelen garbiketaz arduratu beharko dute. Bestalde, zerbitzu honen esleipena urtebetekoa izango da, eta urtero berritu ahal izango da, bost urte arte.

Eskaerak kiroldegian

Lehiaketetan parte hartzeko eskaerak kiroldegiko bulegoetan aurkeztu behar dira. Begirale lanposturako izena emateko epea martxoaren 28an amaituko da; masaje zerbitzuarako epea, berriz, apirilaren 1ean.