Urola Kostako Hitza

irune ibarra » grafologoa

«Orain dela urte batzuk etorkizuna asmatzeko galderak egiten zizkidaten»

Psikologoa eta grafologoa da Irune Ibarra, eta hainbat lan egin ditu marrazketak eta idazkerak nortasunarekin duen loturari buruz; aste honetan hitzaldia eman du Zarautzen

lore agirrezabal

Joan den astelehenean Marrazkiak, haurra ezagutzeko tresna goiburu hartuta, hitzaldia eman zuen Irune Ibarra grafologoak Orokieta Herri Eskolan. Marrazketak nortasunarekin duen loturaz gain, idazkerak daukana ere ezagutzen du Ibarrak, eta horren inguruan jardun du Hitzarekin.

Zer da grafologia?

Idazkera aztertuta, nortasunaren ezagutza. Nortasunaren barruan, osasun fisikoa eta mentala, adimen mota, lan egiteko era eta portaera sartzen dira. Horretan ikus daiteke pertsona arrazionala edo fantasiotsua den, edo dispertsiorako joera duen, lana hobeto egiten duen taldean edo bakarka, borondate indartsua daukan edo ez, irekia den edo gehiago egoten den bere barne munduan, zintzotasun maila, erantzukizunak hartzen dituen edo ez...

Nola jasotzen duzu informazio hori guztia?

Espazioaren antolaketa nola dagoen ikusita, zuria eta beltza nola dauden banatuta, letren neurria erdiko gunea, goikoak, behekoak, hizki larriak..., letren arteko lotura, nola okertzen diren, zein presiorekin idazten den, 't'-ren makilak oso zuzenak diren edo okertuta dauden, ea tinta eten egiten den, nolako kontrastea dagoen orri zuriaren eta tintaren artean, zein sakontasunekin idazten den... Idazkera erritmoa ere aztertzen da; horrek bizitzeko erritmoa erakusten baitu. Idazkera batzuek ez dute ia formarik; bizitza erritmoa bizkorraren seinale. Beste batzuek dedikazio handiagoa ematen diote formari, eta hor ikusten da gauzak geldiro eta ondo egiteko ahalegina. Horrez gain, lerroak ere aztertzen dira: horizontalak diren autokontrola erakusten du horrek, moldakortasuna ere ikus daiteke, hitza ez betetzea ere bai... Baina beti testua eta sinadura konparatzen dira.

Zergatik?

Testuak pertsonaren ni soziala erakusten duelako, eta sinadurak, berriz, ni intimoa edo bere barruan nolakoa den. Beraz, zenbat eta antzekoagoak izan biak orduan eta berdintsuagoa da pertsona barrutik eta kanpotik. Oso desberdinak badira, zein puntutan diren desberdinak ikusi beharko litzateke.

Grafologoak igarleekin nahastu izan dira.

Orain nik uste dut jendeak badakiela zer ikusi daitekeen idazkerarekin. Baina orain dela urte batzuk egiten zizikidaten etorkizuna asmatzeko galderak-eta.

Grafiari behar besteko garrantzia ematen zaio?

Nik uste dut, gaia konplexua dela. Askoz ere liburu gehiago dago irakurketari buruz idazkerari buruz baino. Baina idazten dugunean ez dugu eskuarekin bakarrik idazten; gorputz guztiarekin idazten dugu. Bostehun gihar baino gehiago mugitzen ditugu.

Eta marrazkietatik zer informazio atera daiteke?

Hamazortzi bat hilabetetik aurrera kontsideratzen da zirriborroak aztertu behar direla, esanahi psikologikoa edo haurraren tenperamentua ikusteko seinaleak egoten direlako. Kontuan hartzen da kolorea. Beltza etengabe erabiltzen duen umeak ideia tristeak adieraziko lituzke. Zirriborro asko egiten baditutze alerta seinalea izan liteke; zeloen garaia, gauean beldurra... Gorria etengabe erabiltzea agresibitatearekin lotzen da. Hala ere, zirriborroek eta marrazkiek hasiera bateko diagnostikoa egiten laguntzen dute, baina gero beste froga batzuk egin beharko lirateke.

Pertsona ezagunen baten idazkera aztertu al duzu?

Bai. Besteak beste, Txe Gebararen nortasun txostena egin nuen 1993an idatzi nuen artikulu batean. Nik ez dut ondo ezagutzen bere biografia, baina idatzi hura 1965ekoa zen eta sufrimendu seinaleak agertzen dira. Ez dakit garai hartan gaixorik ote zegoen.

Asmatikoa zen.

Orain ulertzen dut. Normalean arnasa hartu ezin denean edo estres egoeretan ikusten dira letra itxiak, 'o' itxiak-eta. Hori arnasa ezin hartzearen seinale da. Egia esan, kopiaren kopiaren kopia zen eta ez dakit zenbateraino izango ziren letra haiek berez horrela, baina ematen du badagoela letrak ixteko joera bat. Sinadura oso txikia zeukan eta ez zuen maiuskularik egiten; apaltasun seinaleak ikusten dira.

Ezkerra edo eskubia den ikus dezakezu idazkeran?

Bai. Ezkertiek joera dute 't'-ren makila eskuinetik ezkerrera idazteko, edo eskuinetik ezkerrera azpimarratzeko.