Urola Kostako Hitza

Gipuzkoako Foru Aldundiak museoen plangintza berrantolatzeko asmoa azaldu du. Plan berriaren arabera, Lili jauregian egitekoak ziren aurrehistoria museoaren egitasmoa bertan behera gelditu da. Horrekin batera, eraikina zaharberritzeko Europatik etorritako diru laguntza ere izoztuta geratuko da. Zestoako Udalak iazko irailean izan zuen Aldundiaren asmoen berri, Ekain Fundazioaren bileretan. «Gure haserrea azaldu genien orduan», adierazi du Zestoako alkate eta Ekain Fundazioko kide den Alazne Olaizolak. «Ez dugu ulertzen zergatik aurkeztu zuten egitasmoa ekainean eta bi hilabete beranduago, irailean, bertan behera utzi zuten», erantsi du EAE-ANV alderdiko alkateak. Zestoako Udal Gobernuburuaren iritziz, Ekaingo proiektua «herren» geldituko da aurrehistoria museorik gabe. Europak bideratu zuen 1,8 milioi euroko diru laguntza arloka zatituta zegoenez, «zerbaitetarako aprobetxatzeko aukera izatea» espero du Alazne Olaizolak.

Gipuzkoako Foru Aldundiaren ondare-bildumak Irungo URI pabliloian biltzeko asmoa dute. "Gordaiua" izena hartuko duen eraikinean gordeko dute kultur ondarea, bertan zaharberritu eta handik hedatu ahal izateko. Aldundiko aurreko taldeak egindako «memoriaren museo sarea» plangintza alde batera utzi eta lurraldean dauden museoak «dinamizatzeko» plangintza egin du talde berriak. Gipuzkoako Foru Aldundiko Ondare zuzendari Pilar Azurmendik adierazi duenez, Gipuzkoan dauden museo eta areto txikiek ezin dute «biltoki estatikoak» izan eta ondarea eta ekimenak elkarrekin partitzeko aukera izan behar dute.