Urola Kostako Hitza

Errota Harri mitikoarekin atzo arratsaldez Iraetan egin zen jaialdian Joxe Ramon Iruretagoiena, Izeta II izan zen txapeldun, 75 jasoaldirekin. Bigarren, Aimar Irigoien izan zen, 69 jasoaldirekin. Hirugarren, Joseba Ostolaza, 68 jasoaldirekin, eta laugarren Jexux Mari Iruretagoiena, Izeta III, 62 jasoaldirekin.

Atzo arratsaldez, lepo bete zen Iraetako frontoia. Errota Harriarekin antolatutako jaialdi bikainari eguzkiak ere egin zion bisita, eta horrek ikusle asko inguratzea ekarri zuen.
Eskualdeko lau harri-jasotzaile ziren Errota Harri, Iraetako harri mitikoarekin lanean aritu zirenak: Izeta II eta Izeta III anaiak (Aia, Urdaneta), Aimar Irigoien (Errezil) eta Joseba Ostolaza (Zestoa, Arroa goia).
Bost minutuko bi txandatan 108 kiloko bolari jasoaldi gehien nork emango ote zizkion ez zegoen argi. Emozioa eta ikusmin ikaragarria zegoen ikusleen artean.
Lehenengo txandan Ostolazak 37 jasoaldi eman zizkion, Irigoienek 38, Izeta III-k 32 eta Izeta II-k 40. Bigarren txandan, Ostolazak 31, Irigoienek ere 31, Izeta III-k 30 eta Izeta II-k 35. Horrela, bi txandak batuta honela gelditu zen sailkapena: Lehenengo, Izeta II, 75 jasoaldirekin. Bigarren, Irigoien, 69 jasoaldirekin. Hirugarren, Ostolaza, 68 jasoaldirekin. Eta laugarren, Izeta III, 62 jasoaldirekin.
Honenbestez, Txapela eta 800 euroko sari nagusia Izeta II-rentzat izan ziren. Irigoienek 700 euroko saria jaso zuen. Ostolazak 600 eurokoa, eta Izeta III-k 500 eurokoa.